Gleðilegt nýtt ár

Gúrkan óskar lesendum sínum velfarnaðar og velmegunnar á nýju ári. 2008 er ár marðarins samkvæmt evrópskum fornritum. Við fögnum því.

-ritstj. 

Staðarskáli gefur ríkisstjórninni flíspeysur

Ráðherrar ríkistjórnarinnar fengu í gær merktar flíspeysur að gjöf frá vegasjopunni Staðarskála. Er þetta þriðja fyrirtækið sem færir ráðherrum gjöf, en Glitnir og Landsbankinn gáfu kampavíns- og rauðvínsflöskur.

„Peysurnar eru afar veglegar og merktar nafni hvers ráðherra,“ segir Páll Pétur Pétursson, rekstarstjóri Staðarskála. „Með þessari gjöf erum við að undirstrika ósk okkar að þjóðvegurinn færist ekki frá Staðarskála, sem hefur reyndar hingað til ekki staðið til.“

Í bloggfærslu sem Össur Skarphéðinsson skrifaði í nótt segist hann ekki ætla að afþakka peysuna, enda sé hún „algjört lítilræði“. „En ef þetta hefði verið úlpa frá 66°c norður eða kraftgalli þyrfti ég að gera eitthvað fyrir sjoppuna,“ skrifaði hann.

Björgvin Sigurðsson er eini ráðherran sem hefur afþakkað gjöfina, enda á hann að eigin sögn „fullt af miklu flottari flíspeysum.“

Jón Arnór tapaði fyrir La Fortezza

Jón Arnór Stefánsson tapaði fyrir La Fortezza Bologna 6:72 í ítölsku úrvalsdeildinni í körfuknattleik í gær. Jón Arnór lék 16 mínútur í leiknum og skoraði tvær þriggja stiga körfur, en lið La Fortezza gekk á lagið þegar hann sat á bekknum og skoraði án afláts.

„Auðvitað er erfitt að standa í þessu einn,“ sagði Jón Arnór örþreyttur í samtali við ítalska fjölmiðla eftir leikinn í gær. „Svona gera Íslendingar bara í útlöndum. Sjáið bara Eið.“

Jón Arnór situr í neðsta sæti ítölsku úrvalsdeildarinnar og hefur ekki sigrað leik. Hann hefur skorað 45 stig í 12 leikjum - allt úr þriggja stiga skotum - og fengið á sig 1.652. Eins og gefur að skilja hefur hann hvorki náð frákasti né gefið stoðsendingu.

Jón Arnór skoraði 6 stig

Félag ófrægra einstaklinga með fræg nöfn stofnað í Vinabæ í gær

Stofnfundur Félags ófrægra einstaklinga með fræg nöfn (F.Ó.E.M.F.N) var haldinn í gær í Vinabæ. Um sjö manns sátu fundinn, sem allir eiga sameiginlegt að vera alnafnar frægra einstaklinga á Íslandi.

„Það er ekki nóg að bera bara fyrstu tvö nöfnin, föðurnafnið verður einnig að vera það sama,“ sagði Einar Bárðarson, formaður samtakanna í samtali við Gúrkuna. „Félagið er stofnað sem hálfgerð hagsmunasamtök, en við verðum fyrir mikilli truflun og athlægi í samfélaginu.“

Einar sagði ekki óalgengt að blaðamenn og aðdáendur hringi í sig, jafnvel á nóttinni. „Verst finnst mér þegar óvildarmennirnir hringja, ég er svo lítill í mér og tek öllu svona mjög persónulega.“

Sigríður Beinteinsdóttir, ritari F.Ó.E.M.F.N, segist lengi hafa beðið eftir því að félagið yrði stofnað. „Ég er komin með nóg af mótlætinu,“ sagði hún og tók skýrt fram að hún vildi ekki vera kölluð Sigga Beinteins.

Tombólupeningar renna í vasa barns

Hinn 5 ára gamli Aron Angantýr Aronsson hóf í morgun söfnun á hlutum í tombólu sem hann verður með heima hjá sér í Vestmannaeyjum 2. janúar næstkomandi. Aron hyggst láta ágóða tombólunnar renna í eigin vasa, en ekki til góðgerðarmála eins og tíðkast hér á landi.

Forsvarsmenn Rauða krossins á Íslandi eru slegnir yfir framtaki Arons, en tombólur barna eru helsta fjármögnunarleið samtakanna og skila inn allt að þremur milljörðum á ári sem Rauði krossinn notar til að fjármagna hjálparstörf um allan heim.

Aðspurður segist Aron ekki ætla að breyta áformum sínum. „Þeir geta bara átt sig,“ segir hann. „Rauði krossinn segist hjálpa börnum. Ég er barn og ég fékk ömurlegar jólagjafir. Ég verð komast á útsölur í janúar og bæta úr þessu.“

Ekki náðist í foreldra Arons við vinnslu fréttarinnar.

Sally Field fagnar nýju ári á Rex

Bandaríska leikkonan Sally Field, sem nú dvelur á landinu, fagnar nýja árinu á skemmtistaðnum Rex í kvöld ásamt góðum vinkonum sínum Stacy Perkins og Jóhönnu Klemenz.

Jóhanna segir vinkonurnar njóta lífsins út í ystu æsar á Íslandi, en Field hefur ekki veitt íslenskum fjölmiðlum viðtöl. Hún hefur þó gefið íslenskum aðdáendum eiginhandaráritanir og veitt íslenskum karlpeningi verðskuldaða athygli, en þeir eru jafnan taldir þeir fallegustu í heimi.

Karlahópur Femínistafélags Íslands hefur mótmælt komu Sally Field til landsins og segir í tilkynningu að ekki beri að fagna komu konu sem hefur hlutgert karlmenn á jafn óvæginn hátt og Field gerði í spjallþætti Conans O'Brian á síðasta ári.

Fer á Rex

Miðnæturbomban ósátt

Guðrún Karólína Ásmundsdóttir, betur þekkt sem Miðnæturbomban, er mjög ósátt við björgunarsveitarmenn Slysavarnafélagsins Landsbjörg fyrir að kalla sig inn fyrr í kvöld. Þá íhugar hún að höfða meiðyrðamál gegn félaginu fyrir að segja í tilkynningu til fjölmiðla að hún sé gölluð.

„Ég hef gaman að því að vera úti í roki og rigningu. Það er bara hressandi,“ sagði Guðrún, holdvot og ósátt þegar blaðamaður Gúrkunnar hitti hana á heimili hennar fyrr í kvöld. „Það er ekkert að mér og ég vísa ummælum björgunarsveitarinnar til föðurhúsanna. Gölluð? Þvílík andskotans vitleysa!“

Miðnæturbomban innkölluð

Jens Guð stofnar trúarsöfnuð

Ofurbloggarinn Jens Kristján Guðmundsson, betur þekktur sem Jens Guð, hefur stofnað trúarsöfnuðinn Börn Guðs. Sjálfur mun Jens drottna yfir söfnuðinum, en bloggvinir hans hafa allir skráð sig úr Þjóðkirkjunni og öðrum trúarfélögum og gengið til liðs við Börn Guðs.

Í samtali við Gúrkuna sagði Jens að stofnun Barna Guðs væri rökrétt skref í kjölfar gríðarlegra vinsælda hans í bloggheimum. „Ég var í Ásatrúarfélaginu, en það var nú bara eitthvað flipp,“ sagði hann. „Ég hef lengi kallað mig Jens Guð - svo lengi að margir hafa byrjað að líta á mig sem guð.“

Jens segist vera langt kominn með skrif á Biblíu Barna Guðs og bætir við að boðorð hans séu aðeins þrjú. Hann vildi þó ekki gefa upp boðorðin þar sem hann býst við að opinbera þau í fyrstu messu Barna Guðs sem fer fram á Kringlukránni á gamlárskvöld.

Maður skýtur í sig

Sífellt fleiri Íslendingar kjósa að byrja að skjóta upp flugeldum áður en klukkan slær tólf á gamlárskvöld, en óveður síðustu daga hefur gert þeim erfitt fyrir. Að því komst tónlistarmaðurinn Páll „Jack“ Sigurbjörnsson á fimmta tímanum í dag þegar raketta sem hann kveikti í fauk og hafnaði í honum, en ekki í stjörnubjörtum himninum.

Páli varð ekki meint að, en er eins og gefur að skilja nokkuð skelkaður. „Ég skýt alltaf löngu áður en áramótin bresta á, ég elska flugelda,“ segir Páll „Jack“ í samtali við blaðamann Gúrkunnar. „Rokið hefur eyðilagt allt fyrir mér og konan reyndi að stoppa mig þegar ég sagðist ætla að fara út að skjóta í dag. Ég sagði henni bara að ég skýt þegar ég vil.“

Unnið við erfiðar aðstæður

Útilokar ekki þjóðerniskvóta

Björgvin G. Sigurðsson viðskiptaráðherra útilokar ekki að beita þjóðerniskvóta til að fjölga asísku fólki í stjórnunarstöðum fyrirtækja á Íslandi. Slíkir kvótar hafa gefist vel í nágrannalöndum okkar, en Dönsk yfirvöld hafa gengið einna lengst og stefna á að allir stjórnendur danskra fyrirtækja verði asískir árið 2010.

„Þetta fólk er harðduglegt og kann að vinna saman,“ segir Björgvin. „Ég meina, hafið þið séð Kínverja reisa hús? Samvinnan er aðdáunarverð. Íslendingar eru bara frekir eiginhagsmunaseggir.“

Björgvin útilokar ekki að þróa þjóðerniskvótakerfið enn frekar og beita mismunandi kvótum eftir starfsgrein. „Það væri til dæmis mjög sniðugt að skylda fjármálafyrirtæki og banka til að hafa allavega einn gyðing í hverri stjórn. Þeir eru svo nískir!“

Kynjakvóti tekur gildi í Noregi