Hlutabréf hækka á næsta ári

Greiningardeild útibús Landsbanka Íslands á Skagaströnd spáir því að hlutabréf hækki mikið á næsta ári og að úrvalsvísitalan muni hækka um allt að 13.000%. Hólmar Ásgeirsson, útibústjóri, gjaldkeri og eini starfsmaður greiningardeildarinnar, segir spár um fjármálakreppu næsta árs vera „bölvaðan þvætting“ og „úr lausi lofti gripnar.“

„Ég hef ráðlagt öllum mínum kúnnum að fjárfesta íslenskum hlutabréfum á næsta ári,“ segir Hólmar. „Ég meina, það er allt á uppleið. Ég er sérstaklega bjartsýnn á að FL Group komi til með að hækka mikið á næsta ári, en það byggi ég svo sem á engu.“

Hlutabréf lækkuðu á árinu

Fellibylurinn Hanna herjar á landið

Íslensk stjórnvöld hafa lýst yfir neyðarástandi vegna fellibylsins Hönnu sem nú gengur yfir landið. Bílar hafa fokið á hliðina í óveðrinu og víða um land er rafmagnslaust. Þá hafa flugsamgöngur legið niðri og vegum verið lokað.

Selfoss hefur komið einna verst úr óveðrinu, en Ölfussá hefur flætt yfir bakka sína og bæjarbúar sem búa í grennd við ánna eru margir veðurtepptir á þökum húsa sinna. Geir H. Haarde forsætisráðherra hefur lýst yfir að hann muni gera allt sem í sínu valdi stendur til að koma Selfyssingunum til bjargar, en bætti við að sama hefði ekki gilt um Hvergerðinga, væru þeir í háska.

Búist er við logni víða um land um klukkan sjö í kvöld, en þá verður auga fellibylsins yfir landinu. Loks mun aftur bæta í vind með kvöldinu og nóttin verður Íslendingum afar erfið.

Kyrrstæður bíll fauk á hliðina