Sá Tarantino í sturtu í Laugum

Þóroddur „Tóti“ Magnússon sá bandaríska leikstjórann Quinten Tarantino í sturtu í líkamsræktarstöðinni World Class Laugum í gær. Þóroddur komst þar með í eftirsóknarverða stöðu sem íslenskt kvenfólk öfundar hann örugglega af.

„Ég var bara að pumpa járni í gær, það voru ekki margir í stöðinni,“ segir Þóroddur í einkaviðtali við Gúrkuna. „Svo fór ég sturtu og byrjaði að sápa nakinn líkama minn. Ég byrja iðulega á efri hluta líkamans og vinn mig niður. Svo missi ég sápuna og hún rennur að öðrum nöktum manni sem sagði eitthvað á ensku.“

Maðurinn var enginn annar en Quinten Tarantino, en Þóroddur skildi ekki orð af því sem hann sagði þar sem hann lærði aldrei ensku. „Núna sé ég eftir að hafa valið þýskunámið,“ segir hann. „Hver veit nema hann hafi verið að bjóða mér hlutverk í nýjustu kvikmyndinni sinni?“