Félag ófrægra einstaklinga með fræg nöfn stofnað í Vinabæ í gær

Stofnfundur Félags ófrægra einstaklinga með fræg nöfn (F.Ó.E.M.F.N) var haldinn í gær í Vinabæ. Um sjö manns sátu fundinn, sem allir eiga sameiginlegt að vera alnafnar frægra einstaklinga á Íslandi.

„Það er ekki nóg að bera bara fyrstu tvö nöfnin, föðurnafnið verður einnig að vera það sama,“ sagði Einar Bárðarson, formaður samtakanna í samtali við Gúrkuna. „Félagið er stofnað sem hálfgerð hagsmunasamtök, en við verðum fyrir mikilli truflun og athlægi í samfélaginu.“

Einar sagði ekki óalgengt að blaðamenn og aðdáendur hringi í sig, jafnvel á nóttinni. „Verst finnst mér þegar óvildarmennirnir hringja, ég er svo lítill í mér og tek öllu svona mjög persónulega.“

Sigríður Beinteinsdóttir, ritari F.Ó.E.M.F.N, segist lengi hafa beðið eftir því að félagið yrði stofnað. „Ég er komin með nóg af mótlætinu,“ sagði hún og tók skýrt fram að hún vildi ekki vera kölluð Sigga Beinteins.

Athugasemdir

[Guðríður Hrefna Haraldsdóttir, 31.12.2007 kl. 19:44]

SNILLDARFRÉTT - SNILLDARSÍÐA!!!

[Jói (IP-tala skráð) 1.1.2008 kl. 16:20]

haha þetta er eitt það besta sem ég hef lesið